![Remarks by Polly Dunford, Mission Director, USAID Cambodia, Launch Event of Feed the Future Cambodia Harvest II Remarks by Polly Dunford, Mission Director, USAID Cambodia, Launch Event of Feed the Future Cambodia Harvest II](https://2012-2017.usaid.gov/sites/default/files/styles/732_width/public/speech/09-27-2017/dsc09419.jpg?itok=yxlXVcTY)
- សូមគោរព ឯកឧត្តម ទី សុគន្ធ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ
- សូមគោរព ឯកឧត្តម លោកជំទាវ លោក លោកស្រី និងភ្ញៀវកិត្តិយសជាទីមេត្រី!
ខ្ញុំសូមថ្លែងអំណរគុណចំពោះឯកឧត្តម លោកជំទាវ លោកស្រី ដែលបានអញ្ជើញចូលរួមជាមួយខ្ញុំ ដើម្បីប្រកាសដាក់ឲ្យដំណើរការនូវគម្រោង កម្ពុជាហាវែស II ។ គម្រោង Feed the Future គឺជាគំនិតផ្តួចផ្តើមរបស់រដ្ឋាភិបាលសហរដ្ឋអាមេរិក ដើម្បីលុបបំបាត់ភាពអត់ខ្លានជាសកល និងបង្កើនសន្តិសុខស្បៀងនៅលើពិភពលោក។ ភាពជោគជ័យនៃគម្រោង Feed the Future នាពេលកន្លងមក គឺទទួលបានតាមរយៈភាពជាដៃគូរវាងប្រជាជន និងប្រទេសជាតិយើងទាំងពីរ។ ភាពជាដៃគូនេះនឹងបន្តពង្រឹងពង្រីកថែមទៀតតាមរយៈភាពរីកចម្រើនពិតប្រាកដ ដែលយើងកំពុងបំពេញដើម្បីកាត់បន្ថយភាពក្រីក្រ និងភាពអត់ឃ្លានក្នុងប្រទេសកម្ពុជា។
គម្រោង កម្ពុជាហាវែស II ថ្មីមានគោលបំណងចម្រុញកំណើនក្នុងវិស័យសាកវប្បកម្មពាណិជ្ជកម្ម។ មូលហេតុដែលយើងផ្តោតជាសំខាន់លើវិស័យនេះ ដោយសារថាប្រទេសកម្ពុជាដាំដុះបន្លែត្រឹមតែមួយភាគបីប៉ុណ្ណោះនៃតម្រូវការរបស់ប្រជាជនខ្លួននាពេលបច្ចុប្បន្ន។ បន្លែក្រៅពីនេះត្រូវបាននាំចូលមកពីបណ្តាប្រទេសជិតខាង។ ដោយមើលឃើញថា ៧០ភាគរយនៃប្រជាជនកម្ពុជាសរុបបម្រើការក្នុងវិស័យកសិកម្ម យើងជឿជាក់ថាប្រទេសកម្ពុជាប្រទេសកម្ពុជាអាចផលិតបន្លែសុខភាព និងអាហារូបត្ថម្ភបន្ថែមទៀតសម្រាប់បំពេញតម្រូវការប្រជាពលរដ្ឋខ្លួន។ នេះជាមូលហេតុដែលយើងកំពុងបំពេញការងារជាមួយរាជរដ្ឋភិបាលកម្ពុជា ក្រុមហ៊ុនជំនួញ និងសកលវិទ្យាល័យនានាទាំងក្នុង និងក្រៅប្រទេស ព្រមទាំងកសិករ ដើម្បីធានាថាវិស័យកសិកម្មនៅកម្ពុជាអាចបំពេញតម្រូវការរបស់ប្រជាជនកម្ពុជា។
អាត្រាកំណើនជាមធ្យមនៃវិស័យសាកវប្បកម្មក្នុងប្រទេសកម្ពុជាក្នុងចន្លោះឆ្នាំ ២០០៤ និង២០១២ មានប្រមាណ ១០ភាគរយក្នុងមួយឆ្នាំ ប៉ុន្តែកំណើននេះបានបង្ហាញនូវហេតុផលមួយចំនួន។ ក្នុងនោះរួមមាន៖ កង្វះខាតការអនុវត្ត និងបច្ចេកវិទ្យា ព្រមទាំងទីផ្សារនៅមានកម្រិត។ ក្រសួងកសិកម្ម រុក្ខាប្រមាញ់ និងនេសាទក៏បានកត់សម្គាល់ឃើញនូវសក្តានុពលសម្រាប់ការរីកលូតលាស់នៃវិស័យបន្លែផងដែរ។ នៅក្នុងផែនការមេផ្នែកដំណាំដាំដុះសម្រាប់ឆ្នាំ ២០៣០ របស់ក្រសួង ដំណាំបន្លែគឺជាវិស័យអាទិភាពសម្រាប់ផលិតកម្ម។ រាជរដ្ឋាភិបាលកម្ពុជាក៏មានចក្ខុវិស័យផងដែរថាប្រទេសកម្ពុជានឹងមានលទ្ធភាពដាដុះបន្លែដែលមានសុវត្ថិភាពគ្រប់គ្រាន់ត្រឹមឆ្នាំ ២០៣០។ តាមរយៈគម្រោង Harvest II ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិមានការប្តេជ្ញាចិត្តគាំទ្រដល់រាជរដ្ឋាភិបាល និងកសិករឲ្យឈានទៅសម្រេចគោលដៅនេះ។ ដោយទទួលស្គាល់ថារាជរដ្ឋាភិបាលកម្ពុជានឹងវិនិយោគទឹកប្រាក់ច្រើនលានដុល្លារ ដើម្បីជម្រុញកម្មវិធីផលិតកម្មស្បៀង ២០១៦-២០១៩របស់ខ្លួន យើងនឹងសហការជាមួយក្រសួង ដើម្បីធានាថាយើងប្រកៀកស្មាគ្នាឆ្ពោះទៅសម្រេចគោលដៅចុងក្រោយរបស់យើងគឺ ការចិញ្ចឹមកម្ពុជា។
កាន់តែទូលំទូលាយជាងនេះទៅទៀត គម្រោង កម្ពុជាហាវែស II បន្តនូវការប្តេជ្ញាចិត្តដែលមានជាយូរលង់មកហើយនូវកិច្ចគាំទ្ររបស់ទីភ្នាក់ USAID ចំពោះការអភិវឌ្ឍវិស័យកសិកម្មដែលជាវិស័យអាទិភាពរបស់រាជរដ្ឋាភិបាលកម្ពុជា។ ការគាំទ្ររបស់យើងចំពោះខ្សែចង្វាក់តម្លៃសាកវប្បកម្មជួយនាំឲ្យកសិករ អ្នកទិញ និងអ្នកបរិភោគបានខិតកាន់តែជិតគ្នា។ គម្រោង កម្ពុជាហាវែស II ក៏នឹងជួយធ្វើឲ្យប្រសើរឡើងនូវប្រព័ន្ធទីផ្សារបន្លែនៅតាមបណ្តាខេត្តគោលដៅរួមមាន៖ ពោធិសាត់ បាត់ដំបង សៀមរាប និងកំពង់ធំ។ នេះគឺជាភារកិច្ចដ៏លំបាកមួយ ដែលទាមទារឲ្យមានការចូលរួមចំណែកពីរាជរដ្ឋាភិបាល វិស័យឯកជន ប្រទេសផ្តល់ជំនួយដ៏ទៃទៀត ព្រមទាំងអង្គការមិនមែនរដ្ឋាភិបាលផងដែរដើម្បីឈានទៅសម្រេចបាននូវគោលដៅនេះ។
ជាងប្រាំមួយឆ្នាំកន្លងទៅ គម្រោង Feed the Future ក្នុងប្រទេសកម្ពុជាបានចាប់ដៃគូជាមួយរដ្ឋបាលមូលដ្ឋានដើម្បីបំពេញការងារឲ្យកាន់តែប្រសើរឡើងក្នុងការចិញ្ចឹមប្រទេសកម្ពុជា។ យើងបានរួយមគ្នាអនុវត្តនូវវិធីសាស្ត្រធារាសាស្ត្រប្រសើរជាងមុន កាត់បន្ថយការប្រើប្រាស់ថ្នាំកម្ចាត់សត្វល្អិត និងរកឃើញនូវមធ្យោបាយជាច្រើនសម្រាប់ដំណាំស្រូវ បន្លែ និងការចិញ្ចឹមត្រីក្នុងស្រែឲ្យកាន់តែមានប្រសិទ្ធិភាព។ ជាលទ្ធផលនៃភាពជាដៃគូរបស់យើង ប្រជាកសិករកម្ពុជាបានបង្កើនប្រាក់ចំណូលរបស់ខ្លួនដល់ ១១.៥លានដុល្លារក្នុងមួយឆ្នាំ និងបានជួយឲ្យប្រជាជនប្រមាណ ១៨០.០០០នាក់រួចផុតពីភាពក្រីក្រ។ ស្នាដៃសម្រេចបានដ៏មិនគួរឲ្យជឿនេះ នឹងមិនអាចធ្វើទៅបានឡើយ ប្រសិនបើពុំមានកិច្ចគាំទ្រពីសំណាក់មន្ទីរកសិកម្មខេត្ត កសិករ អ្នកផ្តល់ជំនួយ និងសហគ្រិន ដែលកំពុងតែកសាងនូវវិស័យឯកជនមួយប្រកបដោយសមធម៌ និងថាមវ័ន្ត។
ដើម្បីមើលឃើញពីលទ្ធផលជាក់ស្តែងនៃគម្រោង និងកិច្ចសហប្រតិបត្តការរបស់យើង ខ្ញុំសូមស្វាគមន៍ឯកឧត្តម លោកជំទាវ លោក លោកស្រីទៅទស្សនកិច្ចនៅតាមបណ្តាខេត្តដែលយើងកំពុងបំពេញការងារ។ នៅដើមឆ្នាំនេះ ខ្ញុំបានជួបជាមួយប្រជាកសិករ ដែលអនុវត្តនូវប្រព័ន្ធដាំដំណាំបន្លែចម្រុះក្នុងខេត្តសៀមរាប។ ខ្ញុំសប្បាយចិត្តដោយឃើញពួកគេអាចរកចំណូលបន្ថែមពី ១៥០ដុល្លារ ទៅ២០០ដុល្លារក្នុងមួយឆ្នាំ។ ធនធានបន្ថែមនេះអាចឲ្យពួកគេទិញសៀវភៅ និងសម្លៀកបំពាក់សម្រាប់កូនៗរបស់ពួកគេ ដើម្បីទៅសាលារៀន។ វាក៏បានជួយឲ្យពួកគេអាចទិញម៉ូតូមួយសម្រាប់ប្រកបរបរផ្សេងក្នុងកំឡុងពេលចប់រដូវធ្វើស្រែ និងអាចប្រើប្រាស់ចំណូលទាំងនោះទៅវិនិយោគបន្ថែមលើមុខរបរធ្វើស្រែរបស់ខ្លួននាឆ្នាំបន្ទាប់ ដែលនឹងជួយឲ្យពួកគេរឹតតែទទួលបាននូវប្រាក់ចំណូលច្រើនបន្ថែមទៀត។
ទើបតែសប្តាហ៍មុននេះ ខ្ញុំមានឱកាសទៅជួបជាមួយកសិករមួយចំនួនក្នុងខេត្តកំពង់ធំ ដែលដាំដុះបន្លែនៅតាមសួនបន្លែក្នុងផ្ទះរបស់ពួកគេ។ ដោយប្រើប្រាស់នូវបច្ចេកវិទ្យាសាមញ្ញ និងមានតម្លៃទាបដូចជាការប្រើប្រាស់ប្លាស្ទិក ឬបំពង់រក្សាសំណើម និងទ្រើង ពួកគេអាចបង្កើនផលិតកម្មរបស់ខ្លួនថែមមួយកម្រិតទៀត។ ជាលទ្ធផល ពួកគេមានម្ហូបកាន់តែច្រើននៅលើតុបាយ មានស្បៀងកាន់តែច្រើនក្នុងសហគមន៍ ហើយចំនួនកុមារដែលអត់ឃ្លានកាន់តែថយចុះ។
ថ្ងៃនេះ យើងទាំងអស់គ្នាកំពុងរួមចំណែកក្នុងកិច្ចខិតខំប្រឹងប្រែងធំមួយដើម្បីកាត់បន្ថយភាពក្រីក្រ និង កង្វះអាហារូបត្ថម្ភនៅកម្ពុជា។ ការប្រកាសដាក់ឲ្យដំណើរការនូវគម្រោង កម្ពុជាហាវែស II របស់ទីភ្នាក់ងារ USAID នៅកម្ពុជាថ្ងៃនេះគឺជាមធ្យោបាយមួយក្នុងចំណោមមធ្យោបាយជាច្រើនទៀត ដែលរដ្ឋាភិបាលសហរដ្ឋអាមេរិកចូលរួមចំណែកក្នុងភាពជោគជ័យរបស់ប្រទេសកម្ពុជាក្នុងការបញ្ចប់ភាពអត់ឃ្លាន និងអសន្តិសុខស្បៀងក្នុងប្រទេសកម្ពុជា។
ខ្ញុំសូមថ្លែងអំណរគុណចំពោះឯកឧត្តម លោកជំទាវ លោក លោកស្រីដែលមានវត្តមាននៅទីនេះ យើងមកកាន់ទីនេះដើម្បីពង្រឹងការប្តេជ្ញាចិត្តក្នុងការបំពេញការងារជាមួយអ្នកទាំងអស់គ្នា និងគាំទ្រដល់កិច្ចការដែលអ្នកទាំងអស់គ្នាបាន និងកំពុងធ្វើក្នុងវិស័យបន្លែ។ ខ្ញុំពិតជាមានមោទនភាពចំពោះអ្វីដែលយើងសម្រេចបានរួមគ្នានារយៈពេលប្រាំមួយឆ្នាំមកនេះ ហើយខ្ញុំទន្ទឹងរង់ចាំការឈានទៅសម្រេចកិច្ចការជាច្រើនបន្ថែមទៀតក្នុងរយៈពេលប្រាំឆ្នាំបន្តទៅមុខទៀតនេះ។
អរគុណច្រើន!
Comment
Make a general inquiry or suggest an improvement.